En „Plattdütskbeupdragte“ för de Gemeen Rhauderfehn – of: „Vörsörgen – Stön geven – Umsetten!“

"Wat sall dat nu denn al weer?", sall sülk woll de een of anner fragen: "Wi proten doch elke dag Platt, de up d' Gemeen söll'n sük beter um anner Saken kümmern, as um so wat!" Ok vör disse Lü, de daar nix van tomöt sehnt, sall dit Amt woll noch maal deenelk wesen. Leest man even wieder, wi verklaren Jo dat... De Upgaav van en Plattdütskbeupdragten, ok Plattdütskberader nömt, besteiht daarin: a) Unnerstützen van dat Projekt "Plattdütsk bi d' Arbeid" (Vörsörgen) Siet 10 Jahr gifft dat bi de Oostfreeske Landskupp de Arbeidskreis "Tweestrakig Gemeente", de sük u.a. daarmit befaat, dat de Lü, wenn se in 't Raadhuus komen, ok in hör good bekannt plattdütske Spraak hör Wark nakomen könen. Daarmit dat ok in 10 of 15 Jahr noch so is, mutt al vandaag uppaast worden, dat ok dann noch genoog Mitarbeiders in t' Raadhuus arbeiden, de Platt verstahn un proten könnt. Disse Arbeidskreis paast good daarför up un unnerstützt de Gemeen bi Planungen. Van nu of an, sall ut elke Gemeen un ut elke Landkreis en "Plattdütskbeupdragter" disse Arbeidskreis bisitten. b) Wenn Ji wat över of in plattdütsk weten willt, bün wi för Jo daar (Stön geven) De een of anner Fraag kummt woll maal un denn is dat good, een in d' Gemeen to hebben, de Jo bisied steiht un wat weet of weet waar man wat nakieken kann, en Nahkieksel parat hett (Buurman, de Vries, Byl, Brückmann usw.). c) De "Europäiske Charta för Regional- un Minderheidenspraken" mit vörandrieven (Umsetten) Siet 1. Januar 1999 gifft dat de "Europäiske Charta för Regional- of Minderheidenspraken". Disse Charta seggt, dat dat Plattdütske u.a. as Regionalspraak blieven sall. De Landesregierung van Neddersassen hett overnohmen, in Rahm van dat gellende Recht en Rieg van Schutz- un Fördermaßnahmen u.a. för dat Plattdütske vörtonehmen. De Plichten van de Verwaltungsamten stahnt in Artikel 10 van de Charta. Dat Umsetten van de nu al 10 Jahr olle Charta to unnerstützen un vörantodrieven, sall na Will van de Oostfreeske Landskupp ok en Upgaav van de "Plattdütskberaders" wesen De Oostfreeske Landskupp - Plattdütskbüro - is in Juli 2008 an all Amten in Oostfreesland rantreden un hett daarum beden, en Plattdütskbeupdragten to nömen, wenn mögelk van de faste Lü ut Raadhuus. Ok de politiske Will sull düdelk worden. Un so besloot de Verwaltungsausschuss an 26. August 2008 eenstimmig Christa Stumpe van 't Bürgerbüro van d' Gemeen disse Upgaav to overdragen.

För Jo daar is Jo Plattdütskberader bi d'
Gemeen Rhauderfehn -Bürgerbüro-,
1. Wieke 2 A, 26817 Rhauderfehn,
in Bürgerbüro,
anpingeln könnt Ji hör unner 04952-9030
un dör e-mail unner: ch.stumpe@rhauderfehn.de