„Wat sall dat nu denn al weer?", sall sük woll de een of anner fragen: „Wi proten doch elke Dag Platt, de up d' Gemeen sölen sük beter um anner Saken kümmern, as um sowat!" Ok vör disse Lüü, de daar nix van tomööt sehnt, sall dit Amt woll noch maal denelk wesen. Leest man even wieder, wi verklaren Jo dat ...

De Plattdüütskbeupdraggte sall de plattdüütske Spraak in hör/sien Kuntrei stönen un vöranbrengen. Daarto höört ok, dat dat Umsetten van de „Europäiske Charta för Regionaal- un Minderheidenspraken" vörandreven word. Siet 1. Januar 1999 gifft dat de „Europäiske Charta för Regionaal- of Minderheidenspraken". Disse Charta seggt, dat dat Plattdüütske as Regionaalspraak erhollen blieven sall. De Landesregeren van Neddersassen hett dat overnohmen, in d‘ Rahm van dat gellende Recht, en Rieg van Schutz- un Fördermaßnahmen u. a. för dat Plattdüütske vörtonehmen. De Plichten van de Verwaltungsamten stahnt in Artikel 10 van de Charta. Dat Umsetten van de Charta to stönen un vörantodrieven, sall na de Will van de Oostfreeske Landskupp ok en Upgaav van de Plattdüütskbeupdraggten wesen.

In dat Jahr 2000 is bi de oostfreeske Landskupp de Arbeidskreis „Tweesprakig Gemeente" gründt worden, siet dat Jahr 2009 overnehmen de Plattdüütskbeupdraggten van de Landkreisen, de Steden un de Gemeenten de Upgaven. Heel belangriek is, dat Minsken, de in 't Raadhuus of en anner Amt komen, ok in hör good bekannt plattdüütske Spraak hör Wark nakomen könen. Daarmit dat ok in 10 of 15 Jahr noch so is, mutt vandaag al uppasst worden, dat ok dann noch genoog Mitarbeiders in 't Raadhuus arbeiden, de Platt verstahn un proten könen.

Heel belangriek is ok, dat in Seniorenheimen un Pleeginrichtens well is, de mit de oller Lüü noch Platt proten kann un deit.

Dat all geiht natürelk blot, wenn jung Lüü nakomen, de Platt proten könen. Daarum mutt uns Heimatspraak in Kinnergaarns, Scholen un Beroopsscholen fast verankert worden. Ok daar kümmern de Plattdüütskbeupdraggten sük um.

Wenn Ji wat över of in Plattdüütsk weten willt, bün ik för Jo daar un geev Jo Stöön. De een of anner Fraag kummt woll maal un denn is dat good, een in d' Gemeen to hebben, de Jo bisied steiht un wat weet of weet waar man wat nakieken kann, of en Nahkieksel paraat hett (Buurman, de Vries, Byl/Brückmann usw.).

De Oostfreeske Landskupp is in Juli 2008 an all Amten in Oostfreesland rantreden un hett daarum beden, en Plattdüütskbeupdraggten to benömen, wenn mögelk van de faste Lüü ut ‘t Raadhuus. Ok de politiske Will sull düdelk worden. Un so besloot de Rat an 27. Juni 2019 eenstimmig Otto Park ehrenamtlich disse Upgaav to overdragen.

För Jo daar is Jo Plattdüütskberader Otto Park unner 04952-7733 un dör E-mail unner: otto.park(at)kabelmail.de